Jógastund byrjaði sem mastersverkefnið hennar sem hún lagði fram árið 2015. Til að byrja með var um að ræða handbók fyrir grunn- og leikskólakennara sem hafa áhuga á að koma grunnþáttunum heilbrigði og velferð meira inn í hina almennu kennslustofu. Síðan þá hefur hún notað efnið mikið við kennslu í grunnskóla og hefur bókin verið í mikilli þróun, tekið mörgum breytingum og bætingum í ferlinu og kom síðan út árið 2022 í samvinnu við Sögur útgáfu. 

Í dag hentar bókin því bæði vel fyrir fjölskyldur sem vilja hreyfa sig saman og búa til gæðastund í gegnum leik, nánd og hreyfingu sem og metnaðarfulla kennara sem vilja koma til móts við ólíka nemendur sína með fjölbreyttum kennsluháttum sem stuðla að velferð þeirra með því að kenna þeim að takast á við streitu, álag og hlúa að sjálfum sér.

Í framhaldi hefur Anna Rós unnið að því að klára handbókina og aukaefnið sem er nú aðgengilegt fyrir þá sem hafa áhuga á að vinna frekar með bókina og þá sérstaklega leik- og grunnskólakennara.

Í kjölfar bókarinar byrjaði Anna Rós með fjölskyldujóga en það er Jógastund fyrir fjölskyldur eða fullorðinn og barn/börn sem vilja hreyfa sig saman og eiga saman gæðastund í gegnum leik, nánd og hreyfingu. Farið er í gegnum jógastöður, gerðar eru öndunaræfingar, brugðið á leik og endað á ljúfri slökun. Fjölskyldujógað hefur meðal annars verið á viðburðum eins og Vetrarhátíð Hafnarfjarðarbæjar, á bókasöfnum og fleira. Hægt er að hafa samband í gegnum tölvupóst ef áhugi er að bjóða upp á fjölskyldujóga.